කොරෝනා වෛරස් ආසාදනය සම්බන්ධයෙන් පැතිරයන තොරතුරු සත්‍ය ද?

මේ වන විට සමාජ මාධ්‍ය ජාලා ඔස්සේ කොවිඩ්-19 වෛරස් ආසාදනය සම්බන්ධයෙන් විවිධ මත සහ තොරතුරු පැතිර යමින් තිබේ. ලෝක සෞඛ්‍ය සංවිධානය මඟින් ප්‍රකාශයට පත් කරන ලද තොරතුරු මත පදනම්ව මෙම ලිපිය සකසන ලද්දේ පේරාදෙණිය විශ්ව විද්‍යාලයයේ වෛද්‍ය ශිෂ්‍ය මෙත්මල් සුබසිංහ විසිනි.

කොරෝනා වෛරසය වයස් භේදයකින් තොරව ආසාදනය වීමේ අවදානම පවතී. වයස්ගත පුද්ගලයින් සහ ඇදුම, දියවැඩියාව සහ හෘදය රෝග ආදියෙන් පෙළෙන පුද්ගලයින් හට කොරෝනා වෛරසය ආසාදනය වුවහොත් රෝගී තත්ත්වය උග්‍ර විය හැකිය.

කොරෝනා වෛරසය විනාශ වන්නේ උණුසුම් තත්ත්වයන්ගේදී බව සොයා ගෙන ඇත. නමුත් උණුසුම් කාලගුණයේදී හා පරිසර තත්ත්වයකදී වුවද කොවිඩ්-19 වෛරසය සම්ප්‍රේශණය වීමේ හැකියාව ඇත.

ශීත කාලගුණය හෝ අයිස් මඟින් කොවිඩ්-19 වෛරසය විනාශ කළ නොහැක.
දෑත් වියළන උපකරණ භාවිතා කිරීමෙන් කොරෝනා වෛරසය විනාශ කළ නොහැක.

සිරුරේ විෂබීජ හරණයට අධෝරක්ත කිරණ භාවිතය සුදුසු නොවේ. එය සමේ ආසාදන ඇති කළ හැක.

සුදු ළූණු ආයුර්වේදයේ සඳහන් වන සිරුරට ගුණදායක ඖෂධයකි. නමුත්, වර්තමානයේ ලොව පුරා පැතිර යන නව කොරෝනා වෛරසයෙන් ආරක්ෂා වීමට සුදුළූණු ප්‍රමාණවත් නොවේ.

නව කොරෝනා වෛරසය මදුරුවන් මඟින් බෝවන්නේ නැත.

තර්මල් ස්කෑනර් (Thermal Scanner) යන්ත්‍ර මඟින් පුද්ගලයෙකුට උණ තිබේ දැයි සොයා ගත හැකි නමුදු ඔහුට නව කොරෝනා වෛරසය ආසාදනය වී ඇත්දැයි යන්න එමඟින් කිසිසේත්ම සොයා ගත නොහැක.

කොරෝනා වෛරස ආසාදනය වීම වැළැක්වීමට ප්‍රතිජීවක හෙවත් ඇන්ටි බයොටික් (anti-biotic) භාවිතා කිරීම නිෂ්පලය. ප්‍රතිජීවක භාවිතා කළ යුත්තේ බැක්ටීරියා ආසාදන වැළැක්වීමටය.

නිවසේ සිටින සුරතලුන් වන බල්ලන් හා පූසන් මඟින් කොරෝනා වෛරසය සම්ප්‍රේෂණය නොවන බව සොයා ගෙන ඇත.

උණුසුම් ජලයෙන් නෑමෙන් කොරෝනා වෛරසය විනාශ නොවේ.

දැනටමත් සිරුරට කොරෝනා වෛරසය ඇතුළු වී ඇත්නම්, මධ්‍යසාර හෝ ක්ලෝරීන් යොදා අත් සේදීමෙන් හෝ සිරුර පිරිසිදු කිරීමෙන් ප්‍රයෝජනයක් වෙන්නේ නැත.

මධ්‍යසාර පානය කිරීමෙන් සිරුරේ තිබෙන කොරෝනා වෛරසය විනාශ කළ නොහැක. එමෙන්ම කොරෝනා වෛරසය සිරුරට ඇතුළු වීමද මධ්‍යසාර පානයෙන් වළක්වා ගත නොහැක.

දුම්බීමේදී සිරුරේ උෂ්ණත්වය වැඩි වුවද එය කොවිඩ් 19 වෛරසය විනාශ කිරීමට තරම් ප්‍රමාණවත් වන උෂ්ණත්වයක් නොවේ.

කොරෝනා වෛරසයෙන් ආරක්ෂා වීමට දුම්බීමෙන් සහ මධ්‍යසාර භාවිතයෙන් වැළකිය යුතුය. මන්ද ඒවා සිරුරේ ප්‍රතිශක්තිකරණය පහත දමා පෙනහළු දුර්වල කරයි.

කොරෝනා වෛරස් ආසාදනය සඳහා තවමත් ඖෂධයක් සොයා ගෙන නැත.

නියුමෝනියාව සඳහා ලබා දෙනු ලබන එන්නත් වන pneumococcal vaccine සහ Haemophilus influenzae type b (Hib) වලින් කොරෝනා වෛරස ආසාදනයට ප්‍රතිකාර කළ නොහැක.