අති උතුම් දලායි ලාමා වහන්සේ බෞද්ධයින්ගේ සුජීවත්ව සිටින ආධ්‍යාත්මික නායකවරයෙකි. චීනය විසින් ටිබේටය ආක්‍රමණයකොට ටිබෙට් බෞද්ධයන් සංහාරයටත් ටිබේටයෙන් පළවා හැරීමටත් ලක්කළ අතර, එම ආක්‍රෝෂ ආක්‍රමණයන් හමුවේ ටිබේටයේ ආධ්‍යාත්මික මෙන්ම දේශපාලන නායකත්වය ද දැරූ අති උතුම් දළයි ලාමා වහන්සේ ජීවිතාරක්ෂාව පතා දහස් ගණනක් ටිබේට් ජාතිකයින් සමඟ ඉන්දියාවට පළා ගියහ. වර්තමානයේ උන්වහන්සේ ඉන්දියාවේ දේශපාලන රැකවරණ සහිතව ධරම්ශාලාහි ජීවත්ව සිටිති.
මෙහි දැක්වෙන්නේ කොවිඩ්-19 වෛරසය හේතුවෙන් පීඩා විඳින් සකල ලෝවාසීනටම උන්වහන්සේ විසින් ලබා දෙනලද පණිවුඩයයි.
යම් මායා බලයකින් ජීවිතයේ මුහුණදෙන ගැටළු සඳහා උපකාර කරන්නැයි මාගේ හිතවතුන් සමහර අවස්ථාවල මාගෙන් ඉල්ලා සිටිනවා. ඒ සෑම විටම මා ඔවුනට කියන්නේ දළායි ලාමා සතුව කිසිදු මායා බලයක් නෑ කියායි. මා සතුව එවන් බලයක් තිබෙන්නේ නම් මාගේ පයේ හෝ උගුරේ ඇතිවන වේදනාව මට නොදැනෙන්නට තිබුණා. අප සියළු දෙනාම මනුෂ්‍යයින්. අප සියළු දෙනාම බිය, සැක සංකා මෙන්ම බලාපොරොත්තු සහිතව ජීවත් වන සාමාන්‍ය පුද්ගලයින්.
බුදු දමට අනුව සංවේදනා සහිත සෑම ජීවියෙකුගේම ජීවිතය දුකට පත් වීම, රෝගී භාවය, මහළු වයස සහ මරණය සමඟ සබැඳී තිබෙනවා. නමුත්, මිනිසුන් ලෙස අපට හැකියාව තිබෙනවා කේන්තිය, ගිජුබව සහ බිය පරාජය කිරීමට. හැඟීම් වලින් නිදහස් වීම පිළිබඳව මෑතක සිට මා මාගේ දේශනා වලදී වැඩි අවධානයක් යොමු කරනවා. එනම්, යමක් දෙස තරහෙන්, බියෙන් සහ ව්‍යාකූලතාවයකින් තොරව එයාකාරයෙන්ම, පැහැදිළිව බලන්නේ කෙසේද කියා. ගැටළුවට විසඳුමක් තිබෙන්නේ නම්, එය සොයා ගැනීමට අප උත්සුක විය යුතුය. එයට විසඳුමක් නැත්නම් ඒ පිළිබඳව අප කරදර වීම අවශ්‍ය වන්නේ නෑ.
සමස්ත ලෝකයම එකිනෙකා මත යැපෙන බව බෞද්ධයින් ලෙස අප විශ්වාස කරනවා. එහෙයින් මා නිරතුරුවම සෑම දෙනාම එකාවන්ව වගකීම් ඉටු කිරීමේ වැදගත්කම පිළිබඳව දේශනා සිදු කරනවා. කොරෝනා වෛරසයේ සීඝ්‍ර පැතිරීම අපට පසක් කර දෙන්නේ එක් පුද්ගලයෙකුට යමක් සිදු වුවහොත් එය තවකෙකුටත් සිදුවන බවයි. එය අපට තවත් වැදගත් දෙයක් අවධාරණය කරයි. එනම්, රෝහලක රෝගීන් සුව වීමට උපකාර වීම හෝ නිවසේ සිට නිරෝධායනය වෙමින් අප සිදු කරනු ලබන කරුණාවන්ත සහ මානුෂීය ක්‍රියාකාරකම් බොහෝ දෙනෙකුගේ හිතසුව පිණිස හේතුවන බව.
චීනයේ වුහාන්හි කොරෝනා වෛරසයේ පැතිරීම ආරම්භ වූ අවධියේ සිටම චීනයේ සහ ලොව අනෙකුත් ප්‍රදේශවල සිටින මාගේ සහෝදර සහෝදරියන් වෙනුවෙන් මා යාඥා කිරීමටත් නීරෝගී සුවය ප්‍රාර්ථනා කිරීමටත් පටන් ගත්තා. මෙම වෛරසය ඉතා භයානක බව අප සියළු දෙනාම අවබෝධ කරගෙන සිටින්නෙමු. අපගේ ආදරණීයයන් පිළිබඳව අපට ඇත්තේ බියක්. එමෙන්ම, අපගේ අනාගතය සහ ආර්ථික තත්ත්වයත්, ලෝක ආර්ථිකය පිළිබඳවත් අපට ඇත්තේ අවිනිශ්චිත බවක්. නමුත්, එය ජය ගැනීමට යාඥාව හෝ ප්‍රාර්ථනාවන් පමණක් ප්‍රමාණවත් වන්නේ නෑ.
හැකි සෑම අවස්ථාවකම අප වගකීමෙන් කටයුතු කළ යුතු බව මෙම ව්‍යසනය අපට පෙන්වා දී තිබෙනවා . මෙම සටන සඳහා දායකත්වය ලබා දී ඇති වෛද්‍යවරුන්ගේ සහ හෙදියන්ගේ ධෛර්යය සහ විද්‍යාවේ ප්‍රායෝගිකත්වය එකට කැටිකොට අනාගතයේ ඇති විය හැකි මෙවන් ව්‍යසනයන්ගෙන් ආරක්ෂා වීමට අප කටයුතු කිරීමද අවශ්‍යයි.
මෙම බියජනක අවස්ථාවේ අප ජීවත්වන ලෝකය හමුවේ ඇති දීර්ඝ කාලීන අභියෝග සහ අවස්ථා පිළිබඳව අවධානය යොමු කිරීම වටී. අභ්‍යාවකාශයේ සිට ලබා ගන්නා ලද ඡායාරූප මඟින් පැහැදිළිව පෙනෙන්නේ අප ජීවත්වන ලෝකයේ කිසිදු භෞතික මායිමක් නොමැති බවයි. එහෙයින් අප සියළු දෙනාම එය සුරැකීමටත්, දේශගුණික විපර්යාසයන්ගේ අහිතකර ප්‍රතිපල ඇති වීමට ඉඩ නොතැබීමටත් මෙම පෘථිවිය විනාශයෙන් බේරා ගැනීමටත් යුහුසුළුව කටයුතු කළ යුතුයි. අප සැවොම එකට එක්ව කටයුතු කළහොත් මිස අභියෝගයන්ට මුහුණ දීමට නොහැකි බව මෙම ව්‍යසනය අපට අනතුරු අඟවයි.
මෙලොව ජීවත්වන කිසිවෙකුටත් දුකින් මිදීමට නොහැකියි. ජීවත් වන්නට නිවෙසක් නොමැති, මුදල්හදල් හෝ උපකාරයට පවුලක් නොමැති සියළු දෙනාටම හැකි පමණින් උපකාර කිරීමට ඉදිරිපත් විය යුතුයි. අප වෙන් වෙන්ව ජීවත් වුවද, අප සියළු දෙනා එකිනෙකාගෙන් වෙන් වී නොමැති බව මෙම ව්‍යසනය අපට පසක් කර දී ඇත. අප සියළු දෙනාම දයාවේ වැදගත්කම වටහා ගෙන අනෙකාට පිහිට වීම වගකීමක් බව වටහා ගත යුතුයි.
බෞද්ධයෙකු ලෙස මා අනිත්‍යය විශ්වාස කරනවා. අවසානයේ මෙම වසංගත තත්ත්වයද පහවී යනබව මාගේ විශ්වාසයයි. මාගේ ජීවිත කාලය තුල මා යුද්ධ මෙන්ම එවන් බොහෝ බියකරු දේ දැක තිබෙනවා. ඒ සෑම අවස්ථාවකම මෙන්ම මෙවරත් ගෝලීය ප්‍රජාවට නැඟී සිටීමට අවස්ථාව උදා වේ ය යන්න මා විශ්වාස කරනවා. සෑම දෙනාම සුරක්ෂිතව සහ තැන්පත් සිතකින් කාලය ගත කරනු ඇත යන්න මාගේ විශ්වාසයයි. බොහෝ දෙනෙකු විසින් සිදු කරමින් සිටින කැපවීම් කෙරෙහි අපගේ විශ්වාසය කඩ කර නොගෙන සිටීම ඉතා වැදගත්.
පරිවර්තනය පංචමී හේවාවිසෙන්ති
ඡායාරූපය- TIME සඟරාව
Other Articles
ප්‍රතිශක්තිය වඩවන සෙමට ගුණ දෙන පලතුරු අතර රජු- බෙලි
හිස කෙස් ගැටළු සඳහා කුස්සියෙන් සහ ගෙවත්තෙන් විසඳුමක්
