ලංකාවේ ප්‍රසිද්ධ මිනීමැරුම් සහ නඩු තීන්දු

1.  වංගෙඩියක් මිනීමරයි

මෙරට හෙල්ලූ මිනීමැරුම් නඩු අතර 1951 සිදු වූ සතාසිවම් ඝාතන නඩුව බිහිසුණුකම හා සාහසිකකම අතින් ප්‍රධාන පෙලේ නඩුවකි. කොළඹ වැනි ඉතා ජනාකීර්ණ ප්‍රදේශයක පිහිටි සතාසිවම් මහතාගේ නිවස වූ “ජයමංගල” නිවස තුල මහ දවාලේ කාන්තාවකගේ ගෙල මිරිකා අමු අමුවේ මරා දැමීය. නමුත් මෙම අපරාධය සම්බන්ධයෙන් කිසිවෙකුත් දඩුවම් නොලැබීම මෙහි ඇති විශේෂත්වයි.

ශ්‍රි ලංකා පොලීසියේ එවකට සිටි පොලිස්පති සර් රිචඩ් අළුවිහාරේ සහ අධිකරණ වෛද්‍ය විද්‍යාවේ නම ගිය වෛද්‍යවරුන් ගේ මෙන්ම ජත්‍යන්තර මට්ටමේ නමක් දරා සිටී අධිකරණ වෛද්‍යවරයකු වන මහාචාර්ය සිඩ්නි ස්මිත් ගේ පරීක්ෂණයන් හමුවෙ වුවද අපරාධකරුව කොටුකර ගැනීමට නොහැකිවන පරිදි සාක්ෂි පරස්පර විය.

මහෙස්ත්‍රාත් අධිකරණයේ මූලික සාක්ෂි විමසීමකින් අනතුරුව දින පනස් පහක කාලයක් මහාධිකරණයේ විනිසුරුවරයා වූ ඊ. එෆ්. එන්. ග්‍රේෂන් මුලසුන දැරූ විශේෂ ජූරි සභාවක් හමුවේ නඩුව විභාග කෙරිනි. මෙහි පැමිණිල්ල මෙහෙය වූයේ රජයේ අධිනීතිඥ සැමුවෙල් ප්‍රනාන්දු මහතා හා විත්තිකරුවෙකු වූ ක්‍රිකට් ක්‍රීඩක සතාසිවම් වෙනුවෙන් පෙනී සිටියේ සුප්‍රසිද්ධ අධිනීතිඥ කොල්වින්. ආර් ද සිල්වා මහතා ය.

මෙහි එන කාන්තාව ශ්‍රී ලංකා ක්‍රිකට් කණ්ඩායම් නායකයෙක් වී සිටි මහාදේවන් සතාසිවම් ගේ බිරිද රෙජිනා සතාසිවම් වේ. ඇය පොන්නම්බලම් රාමනාදන් මහතාගේ මිනිබිරියක් වූ අතරම විශාල දේපල ප්‍රමාණයකට උරුමකම් කියූ කාන්තාවකි. කෙසේ වෙතත් සතාසිවම් පවුලේ සාමය කඩ වී තිබුනි. වරක් සතාසිවම් මහත්මිය විසින් දික්කසාද වීම සදහා නඩුවක් ගොනු කර තිබියදී දෙමාපියන්ගේ මැදිහත් වීමෙන් එය සමතයකට පත් වුවද නැවත්ත ඇය විසින් දික්කසාද වීමට නඩුවක් ගොනු කර තිබුනි. ඊට ආසන්නතම හේතු වූයේ සතාසිවම් මහතා විසින් හොර රහසේ පවත්වාගෙන ගිය බගර් ජාතික කාන්තාවක් වූ ඉවෝන් ස්ටෙෆන් සමග පැවත්වූ ප්‍රේමය සම්බන්ධය නිසා සහ ඇයව මෙන්ම ළමයින් ව නොසලකා හැර සිටීමයි.

සතාසිවම් මහතා ගෙදරින් පිට ජීවත් වූ අතර ගෙදර සේවකයෙකු ලෙස කලක් සේවය කරන පොඩිහාමිගේ සාක්ෂි වලට අනුව සතාසිවම් මහත්මිය ඝාතනයට පෙර දින දික්කසාද නඩුව සදහා සිතාසි ලැබීම හේතුවෙන් එය ඉල්ලා අස්කරවා ගැනීම සදහා ඇය සමග සාකච්ඡා කිරීම සදහා අලුයම 1.00. ට පමණ නිවසට පැමිණ පසු දින උදෑසන 10.30 ට පමණ පිටත්ව යයි.
මේ හේතුවෙන් පොලීසිය විසින් ප්‍රධාන වශයෙන් සතාසිවම් මහතා සැක කර ඔහුව සැක පිට අත් අඩංගුවට ගනු ලබයි. මේ අතර ජයමංගල නිවසේ ඝාතනයට පෙර, දින 10කට කලින් වැඩකාර මෙහෙයට ආ අවුරුදු 18 ක තරුණයකු වූ විලියම් නැමැත්තා මෙන්ම සතාසිවම් මහත්මියගේ තාලිකෝඩ් නම් වූ රන් පවුම් හතකින් නිමකරන ලද මාලයක්‌ ඇතුලු තවත් රන් භාන්ඩ සහ මුදල් අතුරුදහන් විය. පසුව දින කීපයකට පසුව පොලීසියට ලැබුනු ඔත්තුවකට අනුව තිස්සමහාරාමයේ හුංගම ප්‍රදේශයේ කුඹුරක වැඩ කරන අතරතුරදී මාතර පොලීසිය විසින් ඔහුව සතාසිවම් මහත්මියගේ ඝාතනයට සැකපිට අත් අඩංගුවට ගැනිනි.
කෙසේ වෙතත් එවකට නීතිපති හේම හෙන්රි බස්නායක මහතා විසින් හේවාමාරඹගේ විලියම්ට, අපරාධ නඩු විධාන සංග්‍රහයේ 284 වගන්තිය යටතේ කොන්දේසි සහිත සමාවක් දී ඔහුව රජයේ සාක්ෂිකරුවෙකු කිරීමෙන් පසුව සතාසිවම් මහතාට විරුද්ධව සාක්ෂි ලබා දෙන ලදී.
විලියම් සාක්ෂි ලබා දීම මගින් ප්‍රකාශ කර සිටියේ, සතාසිවම් මහතා බිරිද සමග අඩදඹර වී පසුව ඇයව ඝාතනය කිරීම සදහා සහය වෙන මෙන් ඉල්ලා සිටි අතර ඔහුත් සමග ඇයගේ නිදන කාමරයට ගොස් ඇයට පහර දී බිම දමා දකුණු කකුලෙන් ගෙල පෑගූ බවත්, ඉන් පසුව අතින් ගෙල සිර කර මරා දැමූ බවත් ය. ඉන් පසුව කල උපකාරයට සහ පොලීසියට නොකියා සිටීම වෙනුවෙන් ඇගේ මාලය සහ අනෙකුත් රන් ආභරණ ගලවා දී මුදල්ද ඇගේ පසුම්බියෙන් අරන් දුන් බවයි. තවදුරටත් කියාසිටියේ පසුව දෙදෙනාම එකතු වී ඇයව කුස්සිය හරහා ගරාජයට ගෙන ගොස් දැමූ බවයි. මේ සිදුවීම උදේ 9.30ට පමණ සිදුවූවායැයි විලියම් පැවසීය.
නමුත් කොල්වින්.ආර් ද සිල්වා මහතාගේ දක්ෂ හරස් ප්‍රශ්න ඇසීම හමුවේ සහ පේරාදෙණිය විශ්වවිද්‍යාලයේ මරණ පරීක්ෂණය කල මහාචාර්ය සෙරම් වෛද්‍යවරයා විසින් සොයා ගත් අභන්න්තර තුවාල එකොලහක් සහ බාහිර තුවාල දහාටකට අනුව සාක්ෂි පරස්පර විය.
ඔහුගේ මතය වූයේ, මරණය සිදු වී තිබෙන්නේ ඇය සිටගෙන සිටින විට පිටුපසින් විත් ගෙල මිරිකීමෙන් බවයි. එමෙන්ම මිය යාමෙන් පසුව, පැයකට ශරීරයේ උෂ්නත්වය අඩුවන ප්‍රමාණය ද, ශරීරය දරදඩු වීමට ගතවන කාලය ද, ඇයගේ ආමාශගතව තිබූ ඉදියාප්ප ජීරනය වීමට ගතවන් කාලය සහ කුඩා බඩවැල දිගේ ගමන් කර ඇති දුරත් යන කරුණු සියල්ලම සලකා සතාසිවම් මහත්මිය මිය ගොස් ඇත්තේ උදෑසන 10.30 ත් 11.00 ත් අතර බව ඔහු විසින් ගරු අධිකරණය හමුවේ සාක්ෂි ලබා දුනි. එමෙන්ම මහාචාර්ය ස්මිත් මහතා විසින්ද එම කරුණ සනාථ කරන ලදී.
නිවසේ සේවය කල පොඩිහාමිගේ සාක්ෂියට අනුව සතාසිවම් මහතා 10.30 ට පමණ එදින උදෑසන කිවික්ෂෝ ටැක්සියක් මගින් ගෙදරින් පිටවී ගිය බව කියා සිටි අතර ටැක්සි රියදුරාගේ සාක්ෂියට අනුවද ඔහු උදෑසන 10.30 ට පමණ ගෙදරින් පිටවූ බවත්, සතාසිවම් නෝනා පැමිණ ඔහු ටැක්සියට නැග යන තුරු බලා සිටි බවත් කියා සිටින ලදී.
සියලු සාක්ෂි විමසීමෙන් අනතුරුව ජුරී සභාවට පෙනී ගියේ සතාසිවම් මහතා ඝාතනය සිදු වීමට ප්‍රථම නිවසින් බැහැර වී ඇති බවයි. ඒ අනුව සති 20ක කාලයක් රිමාන්ඩ් බාරයේ සිටි මහදේවන් සතාසිවම්, තම බිරිද ඝාතනයට විරුද්ධව දණ්ඩ නීතී සංග්‍රහයේ 294 වගන්තිය යටතේ මිනී මැරීම යන චෝදනාවෙන් නිදොස්කොට නිදහස් කිරීමට ජුරී සභාව විසින් ඒක මතිකව තීරණය කරන ලදී.
විලියම් රජයේ සාක්ෂිකරුවෙකු වූ නිසා ඔහු ද නිදහස් විය. මෙම නඩුවේදී බොරු සාක්ෂි දීම යන වරද වෙනුවෙන් කිහිප දෙනෙකුට දඩුවම් නියම විය.
අවසානයේ දී අධිකරණයට අනුව සාක්ෂි පරස්පර වීම නිසා සතාසිවම් මහත්මිය ඝාතනය කල කිසිවෙකු නොමැති විය.
ඇය ඝාතනයට ලක් වී බිම වැටී සිටි ස්ථානයේ, කුස්සියේ තිබූ වංගෙඩිය ඇයගේ හිස මත තිබූ බැවින්, “වංගෙඩියක් මිනීමරයි” යැයි ජනයා අතර සුප්‍රකට විය.
– නීතිවේදී තිනෙත් කොරසගල්ල –